🔥 அனுமன் ஜெயந்தி விழா!! 1,00,008 வடை மாலையில் ஜொலித்த நாமக்கல் ஆஞ்சநேயர்… | ஆன்மிகம்

காலை 4.40 மணிக்கு நடை திறக்கப்பட்டு பக்தர்கள் வழிபட அனுமதிக்கப்பட்டனர். தமிழகத்தின் பல்வேறு பகுதிகளில் இருந்து வந்திருந்த பக்தர்கள் மட்டுமின்றி பிற மாநிலங்களை சேர்ந்த ஏராளமான பக்தர்கள் அதிகாலை முதலே நீண்ட வரிசையில் காத்திருந்து ஆஞ்சநேயர் சுவாமியை தரிசனம் செய்தனர். இதனை தொடர்ந்து பால், தயிர், சந்தனம் உள்ளிட்ட நறுமண பொருட்களை கொண்டு அபிஷேகமும் அதனை தொடர்ந்து சுவாமிக்கு தங்க கவசம் அலங்காரமும் செய்யப்பட்டது.

அனுமன் ஜெயந்தியை ஒட்டி ஆஞ்சநேயர் கோவில் முழுவதும், ஒரு டன் வண்ண பூக்கள் கொண்டு ஆஞ்சநேயருக்கு சிறப்பு அலங்காரம் செய்யப்பட்டுள்ளது. பக்தர்கள் ஆஞ்சநேயரை எளிதாக தரிசனம் செய்யும் வகையில் தடுப்புகள் அமைக்கப்பட்டு 2 வழிகளில் இலவச தரிசனமும், 250 ரூபாய் கட்டணத்தில் தரிசனம் செய்திடவும் அனுமதிக்கப்படுவர் என கோவில் நிர்வாகத்தினர் தெரிவித்தனர்.