தமிழ் திரைப்படத் தயாரிப்பாளர் சங்கம்: நீக்கப்பட்ட தயாரிப்பாளர் ராஜேஸ்வரி வேந்தன் சொல்வது என்ன? | Tamil Film Producers Council: What does fired producer Rajeshwari Vendan have to say?

சங்கங்களில் எல்லாம் இது கலக காலம் போல. தென்னிந்திய நடிகர் சங்கத்துக்கு எதிராக நடிகர் நம்பிராஜன் தொடுத்த வழக்கில் இந்த வாரத்தில் தீர்ப்பு வரலாமென்கிறார்கள்.

மறுபுறம் தமிழ் திரைப்படத் தயாரிப்பாளர்கள் சங்கம் சீனியர் தயாரிப்பாளரான ராஜேஸ்வரி வேந்தனை சங்கத்திலிருந்து தற்காலிக நிக்கம் செய்து உத்தரவிட, அவரும் நீதிமன்றம் சென்றுள்ளார். அந்த வழக்கிலும் நாளை தீர்ப்பு வரவிருக்கிறது.

ராஜேஸ்வரி வேந்தன் “தாய்மண் திரையகம்’ என்கிற பேனரில் ‘மயங்கினேன் தயங்கினேன்’, ‘ஜின்’ ஆகிய படங்களைத் தயாரித்தவர். என்ன காரணத்துக்காக தயாரிப்பாளர் சங்கம் இந்த நடவடிக்கை எடுத்துள்ளது என அறிய அவரையே தொடர்பு கொண்டு பேசினோம்.

”நான் இந்தச் சங்கத்துல சீனியர் உறுப்பினர். கடந்த 2018ம் வருஷத்துல இருந்து சங்கத்துல பொதுக்குழு கூட்டப்படலை. இது தொடர்பா பல முறை நிர்வாகிகள்கிட்ட வற்புறுத்தியும் யாரும் கண்டுக்கலை. அதனால சங்கப் பதிவாளர அலுவலகத்துல புகார் செஞ்சேன்.

அங்க இருந்து சங்க நிர்வாகிகள் கிட்ட விளக்கம் கேட்டிருப்பாங்க போல. உடனே, சங்க விதிகளை மீறிட்டீங்க, உங்களை ஏன் தகுதி நீக்கம் செய்யக் கூடாதுன்னு கேட்டு எனக்கு நோட்டிஸ் அனுப்புனாங்க. இந்தக் கேள்வியே அர்த்தமில்லாததுனு என் பதிலை அனுப்பினேன்.