`கத்துக்குட்டி’, ‘உடன் பிறப்பே’ உள்ளிட்ட படங்களை இயக்கிய இரா. சரவணன் இயக்கத்தில், சசிகுமார் நடிப்பில் வெளியாகவுள்ள திரைப்படம் ‘நந்தன்’.
ஹீரோயினாக ஸ்ருதி பெரியசாமி நடித்திருக்கிறார். முக்கியமான கதாபாத்திரத்தில் சமுத்திரக்கனியும் நடித்திருக்கிறார். ஜிப்ரான் இப்படத்திற்கு இசையமைத்திருக்கிறார். செப்டம்பர் 20 ஆம் தேதி இப்படம் வெளியாக இருக்கும் நிலையில் இப்படத்தின் இசை வெளியீட்டு விழா இன்று நடைபெற்றது. இதில் சசிகுமார், இரா.சரவணன், ஸ்ருதி பெரியசாமி, ஜிப்ரான் போன்ற படக்குழுவினரும், சீமான், ஹெச். வினோத் உள்ளிட்ட சிலரும் கலந்துகொண்டுள்ளனர். இந்நிகழ்ச்சியில் பேசிய அ. வினோத், ” 6 மாதத்திற்கு முன்பே இரா. சரவணன் என்னை படம் பார்க்க அழைத்தார்.
ஏற்கெனவே அவரது இயக்கத்தில் சசிகுமார் நடிப்பில் வெளியான ‘உடன்பிறப்பே’ பாசமழை படமாக இருந்தது. இந்தப் படமும் அப்படிதான் இருக்கும் என்று நினைத்து படம் பார்ப்பதை தள்ளிப்போட்டுக்கொண்டு வந்தேன். பிறகு நானும் என் நண்பர்களும் பார்க்க முடிவெடுத்து படத்தைப் பார்த்தோம்.
படம் தொடங்கிய 10- 15 நிமிடங்கள் நார்மலாக படம் இருந்தது. ஆனால் அதன் பிறகு படத்தின் கதையும், அதன் கதாபாத்திரங்களும் மிகவும் நெருக்கமான ஒன்றாக இருந்தது.
நிறைய விஷயங்கள் அதிர்ச்சிகரமாக இருந்தது. பாக்ஸ் ஆபிஸில் மிகப்பெரிய கலெக்ஷன் அள்ளும் படங்கள் எல்லாம் சிறந்த படங்கள் இல்லை. எது சிறந்த படம் என்றால், எந்தவொரு படம் மக்கள் மத்தியிலும் சமூகத்திலும் ஒரு சின்ன மாற்றத்தை ஏற்படுத்துகிறதோ அதுதான் சிறந்த படம். அந்த வகையில் ‘நந்தன்’ சிறந்த படமாக மாற்றத்தை ஏற்படுத்தும். இது ஒரு நல்ல படம். அனைவரும் இப்படத்திற்கு ஆதரவு தர வேண்டும்” என்று பேசியிருக்கிறார்.