💡 Sabarimala Makara Jyothi Live | சபரிமலை ஐயப்பன் கோயில் மகர ஜோதி தரிசனம்.. நேரலையில் பார்க்க.. | ஆன்மிகம்

கூட்ட நெரிசலை தவிர்க்க கேரளா அரசு பல்வேறு கட்டுப்பாடுகளை விதித்துள்ளது. குறிப்பாக, காலை 10 மணி வரை மட்டுமே நிலக்கல்லில் இருந்து பம்பை வரை பக்தர்களுக்கு அனுமதி வழங்கப்பட்டது. அதன்பிறகு பம்பையில் இருந்து சன்னிதானத்திற்கு பக்தர்கள் செல்ல அனுமதியில்லை. மகர ஜோதி தரிசனத்திற்கு பிறகே, பக்தர்கள் 18 ஆம் படியேற அனுமதிக்கப்படுவார்கள்.

இந்நிலையில், பந்தள அரண்மனையில் இருந்து வனப்பாதை வழியாக கொண்டு வரப்படும் திருவாபரணம் மாலை 5.30 மணி அளவில் சரங்குத்தியை வந்தடைந்தது. அதனைத்தொடர்ந்து மாலை 6.20 மணிக்கு திருவாபரணம், சன்னிதானத்திற்கு கொண்டு வரப்படும். இதனால், பாதுகாப்பு கருதி திருவாபரணம் கொண்டு வரப்படும் பாதையில் பக்தர்கள் செல்வதற்கு தடை விதிக்கப்பட்டுள்ளது.

திருவாபரணத்தை பெற்றுக் கொள்ளும் தந்திரி மகேஷ் மோகனரு மற்றும் மேல்சாந்தி பிரசாந்த் நம்பூதிரி அதனை ஐயப்பனுக்கு சாத்தி சிறப்பு தீபாராதனை காட்டுவார். அதன்பிறகு பொன்னம்பலமேட்டில் ஐயப்பன் ஜோதி வடிவில் பக்தர்களுக்கு 3 முறை காட்சி அளிப்பார்.

மகர ஜோதியை காண மலையை சுற்றி 15 இடங்கள் தேர்வு செய்யப்பட்டுள்ளன. குறிப்பாக, திருமுட்டம், பாண்டித்தாவளம், புல்மேடு, பம்பை, சன்னிதானத்தில் ஏராளமான பக்தர்கள் முகாமிட்டுள்ளனர். அதே சமயம், வனப்பகுதிக்குள் சென்று ஜோதியை காண பக்தர்களுக்கு தடை விதிக்கப்பட்டுள்ளது.

மேலும் பக்தர்கள் சமைப்பதற்கு தடை விதித்துள்ள தேவசம் போர்டு, இலவச உணவு பொட்டலங்கள் வழங்கப்படும் என்று அறிவித்துள்ளது. பக்தர்களின் பாதுகாப்பு கருதி, சபரிமலையில் சுமார் இரண்டாயிரம் காவலர்கள் பணி அமர்த்தப்பட்டுள்ளனர். ஜோதி தரிசனம் முடிந்து சொந்த ஊர் திரும்பும் பக்தர்களின் வசதிக்காக ஆயிரம் சிறப்பு பேருந்துகள் இயக்கப்படுவதாக அம்மாநில அரசு தெரிவித்துள்ளது.

ஜோதி தரிசனம் முடிந்ததும் பக்தர்கள் ஒரே நேரத்தில் கீழே இறங்க வேண்டாம் என்றும், காவல்துறையின் அறிவுரையை கண்டிப்பாக பின்பற்றுமாறும் உத்தரவிட்டப்பட்டுள்ளது.