The GOAT Review: விஜய் vs விஜய்; களம் புதுசுதான் – ஆனால் கதை, திரைக்கதை? | The GOAT: A New Approach, But the Same Flaws! | The Greatest of All Time

இரு வேறு தோற்றங்களில் விஜய். இதற்கு முன்பே ‘பிகில்’ படத்தில் அப்பா, மகன் வேடத்தில் நடித்துவிட்டாலும் இது அவருக்கு வேறொரு களம். கலாட்டாவான SATS ஏஜென்ட் மற்றும் கணவர், உடைந்துபோன தந்தை, துள்ளல் மகன் என ஒரே படத்தில் பல்வேறு பரிமாணங்கள். இதில் காந்தி, நாம் ஏற்கெனவே பழக்கப்பட்ட விஜய்தான். ஆனால், மகன் ஜீவனாக எந்த ஒரு கட்டுப்பாடுகளையும் வைத்துக்கொள்ளாமல் இறங்கியடித்திருக்கிறார். உடல்மொழி, சின்ன சின்ன மேனரிசங்கள், நக்கல் என மொத்தமாக அந்தக் கதாபாத்திரத்தில் நாம் இதுவரை பார்க்காத விஜய்யை கண்முன் நிறுத்துகிறார். சில இடங்களில் அது ஓவர்டோஸ் ஆனாலும் படத்தைப் பெருமளவில் தாங்கிப்பிடித்திருப்பதும் அந்த விஜய்யின் நடிப்புதான். பல ஆண்டுகளுக்குப் பிறகு இணையும் விஜய் – சினேகாவின் கெமிஸ்ட்ரி க்யூட்.

நண்பர்கள் கூட்டத்தில் வலுவான பாத்திரத்தைச் சுமந்திருக்கும் பிரஷாந்த், சில காட்சிகளில் கைதட்டல் பெறுகிறார். இவர்கள் அல்லாமல் ஜெயராம், பிரபுதேவா, லைலா, அஜ்மல், வைபவ், பிரேம்ஜி, அரவிந்த் ஆகாஷ் எனப் பலரும் நடித்திருக்கிறார்கள். அனைவரும் கொடுக்கப்பட்ட கதாபாத்திரத்தில் குறையில்லாமல் நடித்துவிட்டுப் போயிருக்கிறார்கள். மற்றொரு நாயகியாக வரும் மீனாக்ஷி சௌத்ரிக்குப் பெரிய வேலையில்லை. இரண்டாம் பாதியின் பரபரப்பைத் தணிக்க யோகி பாபுவின் காமெடி ஒன்லைனர்கள் உதவுகின்றன. முக்கிய வில்லனாக மோகன், சுவாரஸ்யத் தேர்வு என்றாலும் போதிய மிரட்சியை ஏற்படுத்தவில்லை.