ஜி.வி.பிரகாஷ் – கயாடு லோஹர் நடிப்பில் உருவாகியுள்ள ‘இம்மார்ட்டல்’ (Immortal) படத்தின் ஃபர்ஸ்ட் லுக் போஸ்டர்களை வெளியிட்டுள்ளது படக்குழு.
‘கிங்ஸ்டன்’ படத்தின் தோல்விக்குப் பிறகு, தனது அடுத்டுத்த படங்களை கவனமாக தேர்வு செய்து வருகிறார் ஜி.வி.பிரகாஷ். தற்போது அவர் நடித்த புதிய படம் ஒன்று முடிக்கப்பட்டு, அதன் ஃபர்ஸ்ட் லுக் வெளியிடப்பட்டுள்ளது. இப்படத்தை அறிமுக இயக்குநர் மாரியப்பன் சின்னா இயக்கி இருக்கிறார். இந்தப் படத்தின் ஃபர்ஸ்ட் லுக் போஸ்டர்கள் இரண்டுமே இளைஞர்களை ஈர்க்கும் வகையில் அமைக்கப்பட்டுள்ளது.
‘இம்மார்ட்டல்’ எனப் பெயரிடப்பட்டுள்ள இப்படத்தை அருண்குமார் தனசேகரன் தயாரித்துள்ள்ளார். இப்படத்தில் ஜி.வி.பிரகாஷ், கயாடு லோஹர் இணைந்து நடித்துள்ளனர். ஒளிப்பதிவாளராக அருண் ராதாகிருஷ்ணன், இசையமைப்பாளராக சாம் சி.எஸ் ஆகியோர் பணிபுரிந்துள்ளனர். இதன் படப்பிடிப்பு முழுமையாக முடிவுற்று, இறுதிகட்டப் பணிகள் மும்முரமாக நடைபெற்று வருகின்றன.
ஜூனில் இப்படத்தினை வெளியிட படக்குழு முடிவு செய்திருக்கிறது. இதனைத் தொடர்ந்து செல்வராகவன் இயக்கத்தில் உருவாகி வரும் ‘மென்டல் மனதில்’ படத்தில் கவனம் செலுத்தவுள்ளார் ஜி.வி.பிரகாஷ். இதில் நாயகனாக நடித்து, தயாரித்து, இசையமைத்து வருகிறார் ஜி.வி.பிரகாஷ் என்பது குறிப்பிடத்தக்கது.