📌 ஃபாரினுக்கே டஃப் கொடுக்கும் நம்மூரு கொண்டாட்டம்… தூள் கிளப்பிய தூத்துக்குடி கேரல்ஸ்… | ஆன்மிகம்

ஆனால் இந்த ஆண்டு கேரல்ஸ் பவனிக்கு பல்வேறு கட்டுப்பாடுகள் விதிக்கப்பட்டு இருந்தன. குறிப்பாக கேரல் வாகனங்கள் வடிவமைப்பிலும் கட்டுப்பாடுகள் விதிக்கப்பட்டிருந்தது. கடைசி நேரத்தில் கட்டுப்பாடுகள் விதிக்கப்பட்டாலும் கேரல்ஸ் பவனியில் பெரிய அளவில் மாற்றம் இல்லாமல் பரபரப்பாக ஏற்பாடுகள் நடந்திருந்தது.

இந்த ஆண்டு கேரல்ஸ் கார்னிவலில் மொத்தம் 9 கேரல்ஸ் வாகனங்கள் பங்கேற்றன. போர்ட், ட்ரோன், நண்டு, ரோபோ, கிறிஸ்துமஸ் தாத்தா உள்ளிட்ட பல்வேறு தீம்களை மையமாகக் கொண்டு வாகனங்கள் பிரமாண்டமாக வடிவமைக்கப்பட்டிருந்தன. வண்ண வண்ண விளக்குகளால் ஒளி அலங்காரங்கள் மற்றும் DJ இசை கார்னிவலுக்கு கூடுதல் கவர்ச்சியை ஏற்படுத்தின.

பொதுமக்கள் பலரும் பார்பி, ஜாக் ஸ்பேரோ, அவெஞ்சர்ஸ் போன்ற பல்வேறு வேடங்கள் அணிந்து கார்னிவலில் கலந்து கொண்டனர். குழந்தைகள் முதல் இளைஞர்கள் வரை அனைவரும் இசைக்கேற்ப நடனமாடி, உற்சாகமாக கிறிஸ்துமஸ் பண்டிகையை கொண்டாடினர். வாகன ஊர்வலம் நகரின் முக்கிய சாலைகளில் சென்றபோது, இருபுறங்களிலும் திரண்டிருந்த மக்கள் பாட்டுப்பாடி நடனமாடி உற்சாகத்தில் திளைத்தனர்.

இந்த கிறிஸ்துமஸ் கார்னிவல் ஊர்வலம் மாலை 7 மணி அளவில் தூத்துக்குடி ஃபையர் சர்வீஸ் சாலையில் தொடங்கி, WGC சாலை வழியாகச் சென்று, நகரின் முக்கிய பகுதிகளைச் சுற்றிவந்து மாதா கோவில் பகுதியில் நிறைவடைந்தது. ஊர்வலம் முழுவதும் காவல் துறையினர் பாதுகாப்பு ஏற்பாடுகளை மேற்கொண்டிருந்தனர்.

அனைத்து மதத்தினரும் ஒன்றிணைந்து கலந்து கொண்ட இந்த கிறிஸ்துமஸ் கார்னிவல், மத ஒற்றுமையும் சமூக நல்லிணக்கமும் வெளிப்படும் வகையில் அமைந்தது. DJ இசை, ஒளி அலங்காரங்கள் மற்றும் நடனங்களுக்கிடையே, தூத்துக்குடி மக்கள் கிறிஸ்துமஸ் இரவை மகிழ்ச்சியுடனும், உற்சாகத்துடனும் கொண்டாடினர்.