💡 `அவரைச் சந்திக்க விரும்பியதில்லை’ – தந்தையின் பெயரை பயன்படுத்தாதது குறித்து நடிகை தபு விளக்கம்!

தமிழில் கண்டுகொண்டேன் கண்டுகொண்டேன், காதல் தேசம் உட்பட சில படங்களில் நடித்திருக்கும், பிரபல பாலிவுட் நடிகை தபுவிற்கு 54 வயதாகிறது. அவர் திருமணம் செய்துகொள்ளவில்லை.

தபு தொடர்ந்து பாலிவுட் படங்களில் நடித்து வருகிறார். தபு தனது தந்தை பெயரை தனது பெயருக்குப் பின்னால் பயன்படுத்தாது ஏன் என்பது குறித்து விளக்கம் அளித்துள்ளார். இது தொடர்பாக அவரிடம் நிருபர்கள் கேட்டதற்கு, “‘நான் எனது தந்தையைச் சந்தித்ததும் இல்லை. அவரது பெயரை பயன்படுத்துவதும் கிடையாது.

எனக்கு 3 வயதாக இருந்தபோது என்னுடைய பெற்றோர் விவாகரத்து செய்துவிட்டனர். அதன் பிறகு எனது தந்தையுடன் எனக்கு எந்த வித தொடர்பும் கிடையாது.

எனது பெற்றோர் விவாகரத்து செய்து கொண்ட பிறகு நான் என்னுடைய பாட்டி (அம்மாவின் தாயார்) வீட்டில் வளர்ந்து வந்தேன். எனது அம்மா ஓர் ஆசிரியை. இதனால் அதிகமான நேரத்தை எனது பாட்டியுடன் கழித்தேன். எனது பாட்டி புத்தகம் படிப்பது, பிரார்த்தனை செய்வது என்று நேரத்தை செலவிட்டார். நானும் அது போன்ற ஒரு சூழலில் வளர்ந்தேன். எனவே நான் எனது தந்தையை சந்திக்க விரும்பவில்லை. எனது தந்தையின் பெயரை பயன்படுத்தவேண்டிய அவசியம் இல்லை என்று நினைத்தேன். எனவேதான் எனது பெயருக்குப் பின்னால் அவரது பெயரை சேர்க்கவில்லை.

எனது தந்தையின் பெயர் ஹஸ்மி. எனது முழு பெயர் தபசும் பாத்திமா ஆகும். பள்ளியில் எனது சர்நேம் பாத்திமா ஆகும். எனது தந்தையை பற்றிய எந்த நினைவும் என்னிடம் இல்லை. எனது சகோதரி ஒரு முறை அவரை சந்தித்து இருக்கிறார். ஆனால் நான் அவரை சந்திக்க விரும்பவில்லை. நான் இப்போது மகிழ்ச்சியாகவே இருக்கிறேன்” என்றார்.

திருமணம் செய்யாமல் வாழ்வது குறித்து கேட்டதற்கு, ”நான் அதை பற்றி கவலைப்படவில்லை. நான் தனியாக இருக்கிறேனா அல்லது திருமணம் செய்திருக்கிறேனா என்பது பிரச்னை இல்லை” என்று தெரிவித்தார்.