🔥 சிதம்பரம் நடராஜர் கோயில் கனகசபை தரிசன விவகாரம்.. தமிழக அரசு சொல்வது என்ன? | Spirituality News (ஆன்மீக செய்திகள்)

சிதம்பரம் நடராஜர் கோயில் கனகசபை தரிசன விவகாரம் தற்போது அரசியல் ரீதியாக மாற்றப்படுவதாக சென்னை உயர்நீதிமன்றத்தில் பொது தீட்சிதர்கள் தரப்பில் குற்றச்சாட்டு முன்வைக்கப்பட்டது. கனகசபையில் பக்தர்கள் தரிசனம் செய்ய அனுமதி அளித்து தமிழக அரசு பிறப்பித்த உத்தரவை எதிர்த்து, பொது தீட்சிதர்கள் தரப்பில் தாக்கல் செய்யப்பட்ட வழக்கு, நீதிபதிகள் ஆர்.சுரேஷ்குமார் மற்றும் எஸ்.சவுந்தர் அமர்வில் விசாரணைக்கு வந்தது.

அப்போது, தனி பிரிவினருக்குச் சொந்தமான கோயில் விவகாரங்களில் அரசு தலையிட முடியாது என உச்சநீதிமன்றம் ஏற்கனவே தீர்ப்பளித்துள்ளதாக தீட்சிதர்கள் தரப்பில் வாதிடப்பட்டது. இதற்கு பதிலளித்த அறநிலையத்துறை, கனகசபை தரிசன விவகாரத்தில் எந்தவித அரசியலும் செய்யவில்லை என மறுப்பு தெரிவித்தது.

மேலும், ஒரே வழியில் பக்தர்கள் சென்று வர அனுமதிப்பதற்கு பதிலாக, கூட்ட நெரிசலை தவிர்க்க மற்றொரு வழியையும் திறக்க வேண்டும் என்று கோரிக்கை விடுத்தது. இரு தரப்பு வாதங்களை குறித்துக் கொண்ட நீதிபதிகள், வழக்கின் விசாரணையை பிப்ரவரி 19ஆம் தேதிக்கு ஒத்திவைத்து உத்தரவிட்டனர்.