📌 திருச்செந்தூர் முருகன் கோயில் மாசி திருவிழா… கொடியேற்றத்துடன் கோலாகல துவக்கம்… | Spirituality News (ஆன்மீக செய்திகள்)

அதைத் தொடர்ந்து கோவில் கொடிமரம் முன்பு சிறப்பு பூஜைகள் செய்யப்பட்டு அதிகாலை 5.15 மணிக்கு கோவில் செப்பு கொடிமரத்தில் மாசித்திருவிழா கொடியை பட்டாச்சாரியார் முத்துக்குமார சுவாமி ஏற்றினார்.

அப்போது அங்கு இருந்த ஆயிரக்கணக்கான பக்தர்கள் முருகனுக்கு அரோகரா, கந்தனுக்கு அரோகரா, கடம்பனுக்கு அரோகரா, வேலனுக்கு அரோகரா என விண்ணை முட்டும் அளவிற்கு கோஷமிட்டனர்.

அதைத் தொடர்ந்து செப்பு கொடிமரத்திற்கு பால், தயிர், பன்னீர், இளநீர், திரவிய பொடி, திருநீறு உள்பட 16 வகையான திரவியங்களால் அபிஷேகம் நடந்தது. அதைத் தொடர்ந்து அலங்காரமாகி மகா தீபாராதனை நடந்தது.

12 நாட்கள் நடைபெறும் இந்த மாசி திருவிழாவில் 7ஆம் திருநாளான 27ஆம் தேதி சுவாமி சண்முகம் தங்க சப்பரத்தில் சிவப்பு சாத்தி எழுந்தருளும் நிகழ்ச்சி நடைபெறும்.

8ஆம் திருநாளான 28ஆம் தேதி அதிகாலையில் சுவாமி சண்முகம் வெள்ளி சப்பரத்தில் வெள்ளை சாத்தி எழுந்தருளி வீதி உலா வருவார். அன்றைய தினம் மதியம் 12 மணிக்கு மேல் பச்சை நிற கடைசல் சப்பரத்தில் பச்சை சாத்தி எழுந்தருளி வீதி உலா வந்து பக்தர்களுக்கு காட்சியளிப்பார்.

பின்னர் விழாவின் சிகர நிகழ்ச்சியான 10ஆம் திருநாள் தேரோட்டம் 2ஆம் தேதி நடைபெற உள்ளது. அன்று காலை 7 மணிக்கு விநாயகர், சுவாமி, அம்பாள் தனித்தனி தேரில் எழுந்தருளி பக்தர்களுக்கு காட்சி கொடுப்பார்கள். 11 ஆம் திருநாளான 3 ஆம் தேதி இரவு தெப்ப உற்சவம் நடைபெற உள்ளது. இதற்கான ஏற்பாடுகளை கோயில் நிர்வாகத்தினர் செய்து வருகின்றனர்.