🔥 தைப்பூசம் 2026 : முருகனின் அறுப்படை வீடுகளில் கோலாகல கொண்டாட்டம் | Spirituality News (ஆன்மீக செய்திகள்)

முருகனின் அறுபடை வீடுகளில் 3ஆம் படை வீடான பழனியில் பக்தர்களின் காவடி நடனம் பார்ப்போரை கவர்ந்திழுத்தது. தைப்பூச திருவிழாவின் ஆறாம் நாளான நேற்று மட்டும் சுமார் ஒரு லட்சத்து 70 ஆயிரம் பேர் தரிசித்தனர். இதேபோன்று, திருச்செந்தூரில் பாதயாத்திரை சென்ற பக்தர்கள் உடல் முழுவதும் திருநீறணிந்து பக்தி கோஷம் முழங்க நடனமாடினர். ஆயிரக்கணக்கான பக்தர்கள் காவடி சுமந்தும், அலகு குத்தியும் நேர்த்திக்கடன் செலுத்தினர்.

தைப்பூசத்தையொட்டி பழனி மலை விழாக்கோலம் பூண்டது. காவடி சுமந்து பாதயாத்திரையாக வந்த பக்தர்கள் கிரிவலப்பாதையில் மேள தாளங்கள் முழங்க ஆட்டம் பாட்டத்துடன் வலம் வந்தனர். இதனால், பழனி மலையைச் சுற்றி பக்தர்கள் கூட்டம் அலைமோதியது.

இந்நிலையில், மருதமலையில் தைப்பூசத் திருவிழாவின் முக்கிய நிகழ்வுகளில் ஒன்றான சுவாமி திருக்கல்யாணம் கோலாகலமாக நடைபெற்றது. திருவாபரணங்கள் அணிந்து மணக்கோலத்தில் காட்சி அளித்த முருகனை கண்ட பக்தர்கள், “வெற்றிவேல் முருகனுக்கு அரோகரா” என விண்ணதிர முழக்கமிட்டு வழிபட்டனர்.

மலேசியா தலைநகர் கோலாலம்பூரில் தைப்பூச திருவிழாவையொட்டி, வெள்ளித்தேர் ஊர்வலம் நடைபெற்றது. கோலாலம்பூரில் உள்ள மகா மாரியம்மன் கோயிலில் தைப்பூச திருவிழா தொடங்கி நடைபெற்றது. இதன் ஒரு பகுதியாக வெள்ளித்தேர் ஊர்வலம் நடைபெற்றது. இதற்கிடையே பத்துமலை முருகன் கோயிலுக்கு பக்தர்கள் பால்குடம் எடுத்தும், காவடி சுமந்தும் நேர்த்திக்கடனை நிறைவேற்றினர்.