🚀 5 மணி நேரம் காத்திருப்பு.. திருவண்ணாமலையில் குவிந்த கூட்டம்.. பக்தர்கள் அவதி! | ஆன்மிகம்

பஞ்சபூத ஸ்தலங்களில் அக்னி ஸ்தலமாக வணங்கப்படும் திருவண்ணாமலை கோயிலில், அதிகாலை 3.30 மணி அளவில் நடை திறக்கப்பட்டு அண்ணாமலையார் உண்ணாமலை அம்மனுக்கு சிறப்பு அபிஷேகம் ஆராதனைகள் நடைபெற்றன. அதை தொடர்ந்து பக்தர்கள் சாமி தரிசனம் செய்ய அனுமதிக்கப்பட்டனர். வார விடுமுறை என்பதால் தமிழ்நாடு மட்டுமின்றி, கர்நாடகா, ஆந்திரா, தெலங்கானா உள்ளிட்ட அண்டை மாநிலங்களை சேர்ந்த பக்தர்களும் அதிக அளவில் குவிந்தனர். ராஜகோபுரம் வழியாக இலவச தரிசன வரிசையில் 4 முதல் 5 மணி நேரம் வரை காத்திருந்து பக்தர்கள் சாமி தரிசனம் செய்தனர். அவர்களுக்கு குடிநீர், நீர் மோர் உள்ளிட்டவை வழங்கப்பட்டன. தரிசனத்துக்கு பிறகு திருமஞ்சனம் கோபுரம் வழியாக வெளியே சென்ற பக்தர்கள், சுமார் 14 கிலோ மீட்டருக்கு கிரிவலம் சென்றனர்.

இதே போன்று திருச்செந்தூர் சுப்பிரமணிய சுவாமி கோயிலுக்கு பாத யாத்திரையாக வந்த பக்தர்கள் சுமார் 5 மணி நேரம் நீண்ட வரிசையில் காத்திருந்து சாமி தரிசனம் செய்தனர். தென்காசி, விருதுநகர், நெல்லை, ராமநாதபுரம் ஆகிய மாவட்டங்களில் இருந்து பாதயாத்திரை ஆக வந்து வேல் குத்தியும், காவடி எடுத்தும் பக்தர்கள் வேண்டுதல்களை நிறைவேற்றினர். ஐயப்பப் பக்தர்களின் வருகையாலும் வார விடுமுறையாலும் கோயிலில் கூட்டம் அலைமோதியது.