🚀 70 அடி உயரம்… அரண்மனை ஸ்டைலில் ரெடியான குடில்… பிரம்மாண்டமாய் ஈர்க்கும் பாலப்பள்ளம்… | ஆன்மிகம்

குமரி மாவட்டத்தைப் பொறுத்தவரையில் கிறிஸ்துமஸ் பண்டிகை பிரம்மாண்டமாகக் கொண்டாடப்படும் நிலையில், மாவட்டத்தின் பல்வேறு இடங்களில் பிரம்மாண்ட குடில்கள் அமைக்கப்பட்டு வருகிறது. இந்நிலையில் பல லட்சம் செலவில் கன்னியாகுமரி மாவட்டம் பாலபள்ளத்தில் சினிமா செட் போன்று பிரம்மாண்ட குடில் அமைக்கப்பட்டு வருகிறது.

இதுகுறித்து பல ஆண்டுகளாகக் குடில்கள் அமைத்து வரும் அந்தக் குழுவின் ஒருங்கிணைப்பாளர் மருத்துவர் ஹெல்டன் செல்வகுமார் கூறுகையில், “நாங்கள் கடந்த 27 ஆண்டுகளாகத் தொடர்ந்து குடில்கள் அமைத்து வருகிறோம். இந்த வருடம் தொடர்ந்து 28வது ஆண்டாகக் குடில் அமைத்துக் கொண்டிருக்கிறோம்.

இந்த ஆண்டில் 70 அடி உயரத்திலும் 80 அடி அகலத்திலும் மூன்று தளங்களுடன் ஏரோது அரண்மனை (Herod’s Palace) போன்று அமைக்கப்பட்டுள்ளது. இந்த குடிலில் ஏரோது ராஜாவின் வரலாறு மற்றும் மாளிகையின் சிறப்புகள் பற்றி தெரிவிக்கும் வகையில் அமைத்துள்ளோம். இதை அனைவரும் எளிதில் அறியும் வண்ணம் பல்வேறு தொழில்நுட்பங்களைப் பயன்படுத்தி அமைத்துள்ளோம்.

மேலும் வளரும் குழந்தைகளுக்கு கிறிஸ்தவத்தைப் பற்றி தெரிவிப்பதற்காகவும் அவர்கள் எளிதில் அறிந்து கொள்வதற்காகவும் அவற்றை எளிமையான முறையில் காட்சிப்படுத்தி எளிதில் புரிந்து கொள்ளும் வண்ணம் அமைத்துள்ளோம். இந்த குடில் பொதுமக்களின் பார்வைக்காக 23 அன்று மாலை 7 மணி அளவில் திறக்கப்படுகிறது. இதில் பல்வேறு தொழில்நுட்பங்கள் ஆசிய அளவில் முதன்முதலாக இங்குதான் பயன்படுத்தப்படுகிறது” எனத் தெரிவித்தார்.