✅ புன்னை நல்லூர் மாரியம்மன் கோவிலில் லட்ச தீப பெருவிழா!! பால்குடம் எடுத்த பக்தர்கள் | தஞ்சாவூர்

தஞ்சாவூர் அருகே அமைந்துள்ள புன்னைநல்லூர் மாரியம்மன் கோவில், 17-ஆம் நூற்றாண்டில் தஞ்சையை ஆண்ட வெங்கோஜி மகாராஜா எனும் மராட்டிய மன்னரால் கட்டப்பட்டதாக வரலாறு கூறுகிறது. புற்று வடிவில் சுயம்புவாக அம்மன் தோன்றியிருப்பது இந்த ஆலயத்தின் முக்கிய சிறப்பாகும். சோழ மன்னர்கள் மற்றும் மராட்டிய மன்னர்களின் இஷ்ட தெய்வமாக விளங்கிய இத்தலம், தீராத நோய்களைத் தீர்க்கும் சக்தி கொண்டதாக பக்தர்களால் போற்றப்படுகிறது. குறிப்பாக அம்மை நோயால் பாதிக்கப்பட்டவர்கள் இங்கு வேப்பிலை மீது படுத்து விரதமிருந்தால் நோய் குணமாகும் என்பது காலங்காலமாக நிலவி வரும் நம்பிக்கையாகும்.

இந்த நிலையில், ஆண்டுதோறும் அம்மனுக்கு நடைபெறும் பல்வேறு விசேஷ நிகழ்வுகளில் ஒன்றான லட்சத்தீப விளக்கு பெருவிழா இந்த ஆண்டு வெகுவிமரிசையாக நடைபெற்றது. 10 நாட்கள் நடைபெறும் இவ்விழாவின் நிறைவு நாளான டிசம்பர் 25-ம் தேதி, சுற்றுவட்டார பகுதிகளைச் சேர்ந்த 10-க்கும் மேற்பட்ட கிராமங்களிலிருந்து 1,508 பக்தர்கள் பால்குடம் ஏந்தி வந்து தங்களது நேர்த்திக் கடனை நிறைவேற்றினர். திருமணத் தடை நீங்கவும், குழந்தை பாக்கியம் வேண்டியும் பக்தர்கள் முக்கிய வீதிகள் வழியாக ஊர்வலமாக வந்து, புன்னைநல்லூர் மாரியம்மனுக்கு சிறப்பு அபிஷேகம் செய்து வழிபாடு நடத்தினர்.