🚀 ஆங்கில புத்தாண்டு சிறப்பு வழிபாடு…3 டன் மலர்களால் நாமக்கல் ஆஞ்சநேயருக்கு அபிஷேகம்…. | ஆன்மிகம்

இன்று, ஆங்கிலப் புத்தாண்டு பிறப்பை முன்னிட்டு, அதிகாலை 3.30 மணிக்கு கோயில் நடை திறக்கப்பட்டு ஸ்ரீ ஆஞ்சநேயருக்கு வடைமாலை சாத்துபடி செய்யப்பட்டு தீபாராதனை நடைபெற்றது. பின்னர் நல்லெண்ணெய், சீயக்காய், திருமஞ்சள், 1,008 லிட்டர் பால், தயிர், பஞ்சாமிர்தம், மஞ்சள் சந்தனம் உள்ளிட்ட நறுமணப் பொருட்களால் ஆஞ்சநேயருக்கு சிறப்பு அபிஷேகம் நடைபெற்றது. கனகாபிஷேகத்துடன் அபிஷேகம் நிறைவு பெற்றது.

தொடர்ந்து காலை 6:45 மணிக்கு, நாமக்கல் அருள்மிகு ஆஞ்சநேயர் அபிஷேகக் குழு சார்பில், ஸ்ரீ ஆஞ்சநேயருக்கு, துளசி, முல்லை, மல்லிகை, அரளி, அல்லி, ரோஜா உள்ளிட்ட பல்வேறு வகையான, சுமார் 3 டன் மலர்கள் சுவாமி மீது கூடை கூடையாகத் தூவப்பட்டு, சிறப்பு புஷ்பாஞ்சலி நிகழ்ச்சி நடைபெற்றது.

பின்னர் சிறப்பு அலங்காரம் செய்யப்பட்டு, திரை விலக்கப்பட்டு மகா தீபாராதனை நடைபெற்றது. தொடர்ந்து பக்தர்களுக்கு பிரசாதம் வழங்கப்பட்டது. ஆயிரக்கணக்கான பக்தர்கள் நீண்ட வரிசையில் காத்திருந்து சாமி தரிசனம் செய்தனர்.