⚡ மன குறையை நீக்கும் பாதயாத்திரை… முருகன் பக்தர்களின் நம்பிக்கை பயணம் இது ! | திருநெல்வேலி

ஆண்கள், பெண்கள், சிறுவர், சிறுமிகள் என பல்வேறு வயதினரும் பச்சை நிற ஆடை அணிந்து, பால்குடம், காவடி எடுத்தும், அலகு குத்தியும் நேர்த்திக்கடன் செலுத்தும் விதமாக பாத யாத்திரையில் ஈடுபட்டு வருகின்றனர். மேலும், அலங்கரிக்கப்பட்ட லோடு ஆட்டோ, மினி லாரி உள்ளிட்ட வாகனங்களில் முருகப் பெருமானின் உருவப்படம் மற்றும் சிலைகளை வைத்து, திருப்புகழ் பாடல்களைப் பாடியபடி பலர் பயணிக்கின்றனர். பயணத்தின் போது அவர்கள் முடிவு செய்த இடங்களில் ஓய்வெடுத்து மீண்டும் நடைபயணத்தைத் தொடருகின்றனர்.

இந்த பாத யாத்திரை குறித்து பக்தர்கள் கூறுகையில், “திருச்செந்தூர் முருகன் கோவிலில் நடைபெறும் தைப்பூச விழாவில் பாத யாத்திரை ஒரு தனிச்சிறப்பாக விளங்குகிறது. இதற்காக சிலர் மார்கழி மாதத்திலேயே துளசி மாலை அணிந்து விரதத்தைத் தொடங்குகின்றனர். இன்னும் சிலர் தை மாதம் தொடங்கியதும் முருகனை நினைத்து விரதம் மேற்கொள்கிறார்கள். அதனால் தை மாதம் தொடங்கியவுடன் திருச்செந்தூரில் பக்தர்கள் கூட்டம் அதிகரிக்கிறது. தைப்பூசத்தை முன்னிட்டு, ஆயிரக்கணக்கான பக்தர்கள் ‘முருகா… முருகா…’ என்ற சரணகோஷம் முழங்க காவடி சுமந்து நடைபயணமாக வருகிறார்கள்.

பல வழிமுறைகளில் மக்கள் இறைவழிபாடு செய்து வருகின்றனர். திருப்பதிக்கு பாதயாத்திரை செல்வது, ஐயப்பனுக்கு பல நாட்கள் கடுமையான விரதம் இருந்து வழிபடுவது, தமிழ் கடவுளான முருகனுக்குரிய விசேஷ நாட்களில் பாதயாத்திரை மேற்கொள்வது போன்ற பல்வேறு வழிபாட்டு முறைகள் உள்ளன.முருகனுக்குரிய விசேஷ நாட்களில் பல நாட்கள் விரதம் இருந்து காவடி சுமந்து, முருகனை பாதயாத்திரையாக சென்று தரிசித்தால், கர்ம வினைகள் நீங்கி மன அமைதி கிடைக்கும் என்பது பக்தர்களின் நம்பிக்கையாக உள்ளது” என தெரிவித்தனர்.