🔥 பெரிய கோவில் மாட்டுப்பொங்கல்… 2000 ஆயிரம் கிலோ உணவுப் பொருட்களால் நந்திக்கு அலங்காரம் ! | தஞ்சாவூர்

இந்த ஆண்டு, மகா நந்திக்கு லட்டு, ஜாங்கிரி, ஜிலேபி, மைசூர்பாகு, அதிரசம் உள்ளிட்ட பல்வேறு இனிப்பு வகைகளும், முட்டைக்கோஸ், உருளைக்கிழங்கு, கேரட், கத்தரிக்காய் உள்ளிட்ட பல வகையான காய்கறிகளும் என மொத்தம் 2,000 கிலோ (2 டன்) எடையிலான உணவுப் பொருட்களால் மிகப்பிரம்மாண்டமான முறையில் சிறப்பு அலங்காரம் செய்யப்பட்டது. வண்ணமயமான இந்த அலங்காரத்தைக் காணப் பல்லாயிரக்கணக்கான பக்தர்கள் கோயிலில் குவிந்தனர்.

அதனைத் தொடர்ந்து, கோ-பூஜை எனப்படும் பசு வழிபாடும் சிறப்பாக நடைபெற்றது. கோயிலின் நந்தி மண்டபத்திற்கு முன்பாக 108 பசுக்கள் வரிசையாக நிறுத்தப்பட்டு, அவற்றுக்கு சந்தனம், குங்குமம் இட்டு, மாலை அணிவித்து சிறப்பு பூஜைகள் செய்யப்பட்டன. பின்னர் மகா நந்திக்கும், பசுக்களுக்கும் மகா தீபாராதனை காண்பிக்கப்பட்டது. இதில் தஞ்சை மாவட்டம் மட்டுமின்றி, தமிழகத்தின் பல்வேறு பகுதிகளில் இருந்தும் வருகை தந்த பக்தர்கள் நீண்ட வரிசையில் நின்று சுவாமி தரிசனம் செய்தனர்.