💡 சிவமணி இசையில் பக்தி பரவசம்… 4 கால பூஜையுடன் களைகட்டிய பெருவுடையார் கோவிலில் சிவராத்திரி | தஞ்சாவூர் செய்தி(Thanjavur News)

சிவராத்திரி தினத்தில் இரவு முழுவதும் கண்விழித்து இருந்து, சிவாலயங்களுக்கு சென்று சிவபெருமானின் நாமத்தை ஜபிப்பதன் மூலம் கர்ம வினைகள் நீங்கி, நினைத்த காரியங்கள் நிறைவேறும் என்பது ஐதீகம். இதனை முன்னிட்டு, தஞ்சை பெரிய கோவிலில் மாலை 6 மணி முதலே ஆயிரக்கணக்கான பக்தர்கள் திரண்டனர்.

பக்தர்களுக்கு நெரிசல் ஏற்படாத வகையில், கோவில் நுழைவாயிலுக்கு செல்லும் நேரடி பாதையைத் தவிர்த்து மாற்றுப் பாதைகள் கோவில் நிர்வாகம் சார்பில் ஏற்பாடு செய்யப்பட்டிருந்தது. பாதுகாப்பு மற்றும் ஒழுங்கு நடவடிக்கைகளும் வலுப்படுத்தப்பட்டிருந்தன.

பெருவுடையாருக்கு இரவு 10 மணிக்கு தொடங்கிய பூஜைகள், ஒவ்வொரு இரண்டு மணி நேரத்திற்கு ஒருமுறை நடைபெறும் வகையில் நான்கு கால பூஜையாக நடைபெற்றது. தொடர்ந்து, காலை 5 மணிக்கு அர்த்தஜாம பூஜையுடன் மகா சிவராத்திரி விழா நிறைவு பெற்றது.

பக்தர்கள் பாதுகாப்பாக தரிசனம் செய்ய ஏராளமான போலீசார் பாதுகாப்பு பணியில் ஈடுபட்டிருந்தனர். மகா சிவராத்திரியை முன்னிட்டு தஞ்சை பெரிய கோவில் பக்தி பரவசத்தில் மூழ்கியது.