💡 மகா சிவராத்திரியில் அய்யனாருக்கு பால்குட திருவிழா – பக்தி வெள்ளத்தில் களைகட்டிய வடக்கூர் | தஞ்சாவூர் செய்தி(Thanjavur News)

மகா சிவராத்திரியை முன்னிட்டு தஞ்சை மாவட்டம் முழுவதும் பல்வேறு ஆலயங்களில் பால்குடம், காவடி மற்றும் தேர் திருவிழாக்கள் நடைபெற்றன. அதன் ஒருபகுதியாக வடக்கூர் கிராமத்தில் உள்ள பெருவேம்பர் அய்யனார் கோயிலில் நேற்று மாலை நடைபெற்ற பால்குட காவடி திருவிழாவில், வடக்கூர் மற்றும் சுற்றியுள்ள நான்கு கிராமங்களைச் சேர்ந்த பக்தர்கள் திரளாக கலந்து கொண்டனர். பக்தர்கள் பால்குடம் மற்றும் காவடி ஏந்தி வந்து தங்களது நேர்த்திக்கடனை நிறைவேற்றி சாமி தரிசனம் செய்தனர். சிறுவர்கள் கூட பால்குடம் மற்றும் காவடி ஏந்தி பங்கேற்றது விழாவிற்கு சிறப்பு சேர்த்தது.

கடவுள்களுக்கு பால்குடம் எடுத்தல் என்பது நேர்த்திக்கடன் செலுத்துவதற்கும், நினைத்த காரியங்கள் நிறைவேற வேண்டியும் மேற்கொள்ளப்படும் முக்கியமான ஐதீகமாக கருதப்படுகிறது. தூய்மையான பசு பாலைக் குடத்தில் ஏந்தி வந்து இறைவனுக்கு அபிஷேகம் செய்வதன் மூலம் மனமும் உடலும் தூய்மை அடையும் என்பது பக்தர்களின் நம்பிக்கையாகும். மேலும், வேண்டுதல் நிறைவேறியதற்கான நன்றிக்கடனாகவும், மன அமைதிக்காகவும் இந்த வழிபாடு மேற்கொள்ளப்படுகிறது.