🚀 நாளை சனிப்பெயர்ச்சி விழா… திருநள்ளாறில் பாதுகாப்பு ஏற்பாடுகள் தீவிரம் ! | Spirituality News (ஆன்மீக செய்திகள்)

இந்த ஆண்டின் சனிப்பெயர்ச்சியில், சனீஸ்வர பகவான் கும்ப ராசியிலிருந்து மீன ராசிக்கு பிரவேசிக்கிறார். இந்த அரிய தரிசனத்தை காண நாடு முழுவதும் இருந்து பக்தர்கள் வருகை தர உள்ளனர். இதனால் ஆலய வளாகம் மற்றும் சுற்றுப்புறங்களில் கூடுதல் பாதுகாப்பு, போக்குவரத்து ஒழுங்குமுறை மற்றும் மருத்துவ வசதிகள் ஏற்பாடு செய்யப்பட்டுள்ளன. மாவட்ட நிர்வாகம் ஒருங்கிணைப்பில் நடைபெற்ற ஒத்திகையில், கூட்ட நெரிசலின் போது பக்தர்களுக்கு உடல்நலக்குறைவு ஏற்பட்டால் உடனடி முதலுதவி அளித்து, ஆம்புலன்ஸ் மூலம் மருத்துவமனைக்கு அனுப்பும் நடைமுறை செயல்படுத்தப்பட்டது. மருத்துவத்துறை, காவல்துறை மற்றும் அவசர மீட்பு படையினர் இணைந்து செயல்திறன் பயிற்சியில் ஈடுபட்டனர்.

மேலும், எள் தீபம் ஏற்றும் பகுதியில் தீ விபத்து ஏற்பட்டதாக கருதி தீயணைப்பு துறையினர் அவசர மீட்பு பயிற்சி மேற்கொண்டனர். அதனைத் தொடர்ந்து, நளங்குளத்தில் புனித நீராடும் பக்தர்கள் நீரில் சிக்கியிருந்தால் படகு மூலம் மீட்டு மருத்துவ உதவி அளிக்கும் மீட்பு ஒத்திகையும் நடத்தப்பட்டது. இந்த ஒத்திகை நிகழ்ச்சியில் அனைத்து அரசு துறை அதிகாரிகளும் கலந்து கொண்டு பணித் திட்டங்களை மதிப்பாய்வு செய்தனர். பக்தர்கள் பாதுகாப்பாக சனிப்பெயர்ச்சி விழாவில் கலந்து கொள்ளும் வகையில் அனைத்து முன்னெச்சரிக்கை நடவடிக்கைகளும் மேற்கொள்ளப்பட்டுள்ளதாக அதிகாரிகள் தெரிவித்தனர்.