💡 Sabarimalai | முடிந்தது சபரிமலை சீசன்.. இன்று இரவுடன் சபரிமலை ஐயப்பன் கோயில் நடை அடைப்பு..! | ஆன்மிகம்

2025-26-ஆம் ஆண்டுக்கான மண்டல, மகர விளக்கு சீசன் கடந்த நவம்பர் மாதம் தொடங்கியது. மண்டல பூஜை கடந்த மாதம் 27-ந் தேதி நடைபெற்றது. பின்னர் மகர விளக்கு பூஜைக்காக டிசம்பர் 30-ந் தேதி கோயில் நடை திறக்கப்பட்டு, கடந்த 14-ந் தேதி ஜோதி வடிவில் அய்யப்பன் காட்சி அளித்தார்.

நடப்பு சீசனை முன்னிட்டு நேற்றுடன் நெய்யபிஷேக, களபாபிஷேக வழிபாடுகள் நிறைவடைந்தன. கோயிலில் இன்று இரவு 10 மணி வரை மட்டுமே பக்தர்கள் தரிசனத்திற்கு அனுமதிக்கப்படுவார்கள். பின் நடை அடைக்கப்படும்.

நடப்பு மண்டல மகர விளக்கு சீசன் நிறைவாக நாளை அதிகாலை 5 மணிக்கு கோயில் நடை திறக்கப்பட்டு நிர்மால்ய தரிசனம், கணபதி ஹோமம் மற்றும் அபிஷேகம் நடைபெறும். காலை 6.30 மணிக்கு பந்தளம் ராஜ குடும்ப பிரதிநிதி சாமி தரிசனம் செய்தபிறகு நடை அடைக்கப்படும். நாளை பக்தர்களுக்கு தரிசனம் செய்ய அனுமதி இல்லை.

அத்துடன் நடப்பு மண்டல, மகர விளக்கு சீசனுடன், தை மாத பூஜை வழிபாடுகளும் நிறைவு பெறும். தொடர்ந்து மாசி மாத பூஜைக்காக சபரிமலை அய்யப்பன் கோவில் நடை மீண்டும் அடுத்த மாதம் 12-ஆம் தேதி மாலை 5 மணிக்கு திறக்கப்பட்டு 17-ஆம் தேதி சிறப்பு பூஜை மற்றும் வழிபாடுகள் நடைபெறும்.